Die fünfzehn Namen des Boyne

Die fünfzehn Namen des Boyne (aus Laud 610, fo. 116b)

A ēcsiu Fāil, fēgam sein,
dēnam dāil nāchandubaig,
samlam ann-ōge uili
anmann Bōinne Bregmaige.

Cōic anmand dēc tre blaid m-binn
fil d'anmanaib for Bōinn,
ō Sīth Nechtain, nīth im gail,
co pardus n-ūasal n-Ādaim.

Segais a h-ainm isin sīd
intan failsigthir īar fīr,
Sruth Segsa ōtā sīd somma
co Linn Mocōe Nōemdroma.

Dā n-ainm fuirre ō sin immach
i l-Laignib na laechmarcach:
Rig Mnā Nūadat, nī lūad lac,
ocus Colpa Mnā Nūadat.

Bōänd i m-Mide na māl,
dā n-ainm fuirri ō sein co sāl:
Mōrchuing Argait, h-ūaisle de,
ocus Smir find Feidelme.

Trethnach tonn co Cūalngne h-ūass cath,
Sruth Findchuill co Loch n-Echach,
galla a nem re gail n-glūair n-gil,
Banna īar sin co Tūaig inbir.

Lunann i n-Alpain cen ail,
sruth Sabrann i Saxanaib,
sruth Tibir i r-Rōim na recht,
dligid co cōir comaitecht.

Sruth n-ard n-Eordanān, nī cēl,
hi tīrib mac n-Israēl,
Tigir a h-ainm īar n-astar
hi pardus na prīmapstal.

Ropond¹ bēo for deis mic Dē
īar n-ētsecht, īar n-essērge,
is hē ro-fargnī, ro-fes,
iss ē ardrī na n-ēces.

A hēcsiu F.

---

Notes

1. Die Handschrift hat 'robond'; über dem b steht nō p. ⇐